खेल २१ भाद्र २०८०
पछिल्लो दशकमा ट्रान्सफरमा सबैभन्दा धेरै खुद खर्च गर्नेमा युनाइटेड अगाडि, रियल बोर्नमाउथभन्दा पछि

ओमकार टाइम्स

काठमाडौँ । प्रिमियर लिग क्लब म्यानचेस्टर युनाइटेड पछिल्लो १० वर्षमा खेलाडीको खरिदमा सबैभन्दा बढी खुद खर्च गर्ने क्लबको सूचीमा शीर्ष स्थानमा रहेको छ ।

क्लबले खेलाडी बिक्री गरेको रकम घटाएर पनि खेलाडी खरिद गर्दा यो अवधिमा १ अर्ब १९ करोड पाउन्ड खर्च गरेको हो ।

सीआईईएस फुटबल अबजरभेटरीको रिपोर्टअनुसार सन् २०१४ यता युनाइटेडले नयाँ खेलाडीमा १ अर्ब ६७ करोड पाउन्ड खर्च गरेको छ भने खेलाडी बिक्रीबाट ४८.१ करोड पाउन्ड आम्दानी गरेको छ । यसक्रममा युनाइटेडले सन् २०१६ मा पाउल पोग्बालाई ८.९५ करोड, सन् २०१७ मा ७.५ करोडमा रोमेलु लुकाकु, सन् २०१९ मा ८ करोड पाउन्डमा खरिद गरेको थियो ।

खुद खर्च ८८.३ करोड पाउन्ड सहित चेल्सी दोस्रो स्थानमा रहेको छ भने ८६.३ पाउन्ड खर्चसहित फ्रेन्च क्लब तेस्रो स्थानमा रहेको छ । चेल्सीले यसबीचमा खेलाडीमा सबैभन्दा बढी २ अर्ब २५ करोड पाउन्ड खर्च गरेपनि उसले खेलाडी बिक्रीबाट १ अर्ब ३८ खर्ब पनि आम्दानी गरेको छ । सन् २०२३ मा भने खेलाडी खरिदबिक्रीमा चेल्सीको विश्वमै सबैभन्दा बढी ४७.६ करोड घाटा रहेको छ ।

आर्सनल र म्यानचेस्टर सिटी क्रमशः चौथो र पाँचौँ स्थानमा रहेका छन् । शीर्ष २० मा १३ क्लब प्रिमियर लिगका रहेका छन् । प्रिमियर लिगले सन् २०१४ यता सबैभन्दा बढी ९ अर्ब ५० करोड पाउन्ड खर्च गरेको छ ।