लामो समयदेखि रुससँगको युद्धमा होमिएको युक्रेनकी एक खेलाडीले विश्व एथलेटिक्समा ३७ वर्ष पुरानो कीर्तिमान भंग गरेकी छन् । हाई जम्पकी २२ वर्षीया युक्रेनी खेलाडी यारोस्लावा महुचिखले पेरिस डायमन्ड लिगमा कीर्तिमानी प्रदर्शन गर्दै इतिहासमा आफ्नो नाम लेखाएकी हुन् ।
यारोस्लावाले आफ्नो स्पर्धामा २.१० मिटरको उत्कृष्ट प्रदर्शन गरेकी थिइन् । उक्त स्पर्धामा उनले नै स्वर्ण पदक पनि हात पारिन् । त्यसअघि त्यो स्पर्धाको विश्व कीर्तिमान बुल्गेरियाकी खेलाडी स्टेफका कोस्टाडिनोवाको नाममा रहेको थियो ।
कोस्टाडिनोवाले सन् १९८७ मा रोममा सम्पन्न विश्व एथलेटिक्स च्याम्पियनसिपमा २.०९ मिटरको प्रदर्शनसहित उक्त कीर्तिमान आफ्नो नाममा पारेकी थिइन् । अन्तर्राष्ट्रिय प्रतियोगितामा विश्व कीर्तिमान बनाएपछि उनी निकै भावुक बनेकी थिइन् ।
‘हामी खेल मैदानमा पनि आफ्नो देश, आफ्ना नागरिक र आफ्ना सैनिकका लागि लडिरहेका छौँ । हामी कुनै पनि क्षेत्रमा हार मान्दैनौँ भन्ने कुरा सिंगो विश्वलाई देखाउन चाहन्छौँ,’ कीर्तिमानी स्वर्ण जितेपछि यारोस्लावाले भनेकी छन् ।
यारोस्लावाले सन् २०२० मा सम्पन्न टोकियो ओलम्पिकमा पनि कांश्य पदक जितेकी थिइन् । उनले अब आफ्नो लक्ष्य पेरिस ओलम्पिकमा केन्द्रित भएको पनि बताएकी छन् । उनले आफ्नो लक्ष्य पेरिस ओलम्पिकमा स्वर्ण पदक जित्ने रहेको बताइन् ।
आफ्नो देश युक्रेन लामो समयदेखि युद्धको चपेटामा परेकाले यारोस्लावाले डायमन्ड लिग र पेरिस ओलम्पिकको तयारी विदेशमा गरेकी थिइन् । उनले अन्तर्राष्ट्रिय ओलम्पिक कमिटीले रुस र बेलारुसलाई ओलम्पिकमा सहभागी हुनबाट रोक लगाएर राम्रो निर्णय गरेको प्रतिक्रिया पनि दिएकी छन् ।
