• देश

    संसदमा प्रधानमन्त्री र वनमन्त्री बस्नेतको राजीनामा मागियो

      ओमकार टाईम्स

    प्रतिनिधिसभाको बैठकमा प्रधानमन्त्री केपी शर्मा ओली र वन मन्त्री शक्ति बस्नेतको राजीनामा माग गरिएको छ ।

     

    शुक्रबार बसेको प्रतिनिधि सभाको बैठकमा बोल्दै नेपाली कांग्रेसका सांसद तेजुलाल चौधरीले प्रधानमन्त्रीको राजिनामा माग गरेका हुन् । उनले प्रधानमन्त्रीको स्वास्थ्यका साथै देशको पनि चिन्ता लागेको बताउदै भ्रष्टाचारी भाइरसले देशको मुटु, फोक्सो, कलेजो र नसामा पसेर आम जनताको रगत र पसिना चुसेकोमा चिन्ता लागेको बताए । उनले प्रधानमन्त्रीले आसेपासे भ्रष्टाचारीलाई संरक्षण गरेको भन्दै राजीनामा माग गरे ।

     

    उनले भने–‘शरीरको अंग भएर पनि काम नलाग्ने भएपछि फेर्न पर्दो रहेछ नी । त्यसैले आफ्नो आसे पासे भएपनि देश र जनताको लागि काम नलाग्ने भएपछि किन अहिलेसम्म भ्रष्टाचारीलाई कारवाही भइरहेको छ । नैतिकताको आधारमा राजीनामा दिन जोडदार माग गर्न चाहन्छु ।’

     

    सांसद दिल कुमारीले वन मन्त्री शक्ति बस्नेतको राजीनामा माग गरेकी छिन् । उनले राजतन्त्र सकिएपनि मन्त्रालयमा राणाशासन रहेको उल्लेख गर्दै वन मन्त्रालयमा आफूमाथि दुर्व्र्यवहार भएको बताएकी छिन् । उनले  मन्त्रीको स्वकीय सचिव र कर्मचारीले समानुपातिक कि प्रत्यक्ष निर्वाचित भनेर प्रश्न गरेको गुनासो गरेको बताइन् ।

     

    उनले वन मन्त्रीको राजीनामा माग गर्दै उनका स्वकीय सचिव धिरज उप्रेतीले हदैसम्मको अपमान गरेको बताइन् ।

     

    यस्तै नेपाली काँग्रेसकी सांसद डिला संग्रौलाले सेक्युरिटी प्रिटिङ प्रेस प्रकरणमा पूर्व सञ्चारमन्त्री गोकुल बास्कोटालाई कारवाही गर्न माग गरेकी छिन् । शुक्रबार बसेको प्रतिनिधिसभाको बैठकमा शून्य समयमा बोल्दै संग्रौलाले भ्रष्टाचारले कोरोना भाइरसले जस्तै तर्साएको बताइन् ।

     

    उनले प्रधानमन्त्रीले आत्मविश्वासले रोगलाई जित्न सकेपनि भ्रष्टाचारलाई जित्न नसकेको बताइन् । प्रधानमन्त्रीे भ्रष्टाचारीलाई संरक्षण गरेको भन्दै उनले सेकुरिटी प्रिटिङ्ग प्रेसमा भएको करोडौँ भ्रष्टाचारको छानविन गर्न आग्रह गरे ।

    प्रतिकृया दिनुहोस