• राजनीति

    यौन दुर्व्यवहारमा सफाइ पाएका महरालाई अर्को खड्गो

      ओमकार टाईम्स

    आफ्नै सचिवालयकी महिला कर्मचारीले यौन दुर्व्यवहारको अभियोग लगाएपछि कृष्णबहादुर महराको हुँदाखाँदाको सभामुख पदमात्रै गएन, जीवनभर पौरख गरेर उचालेको राजनीतिक उचाई गल्र्यामगुर्लुम्म ढल्यो ।

     

     

    पुर्पक्षका लागि डिल्लीबजार कारागारमा केही महिना गुजारेका महरालाई काठमाडौं जिल्ला अदालतको आदेशले राहत मिलेको छ । जिल्ला अदालतको फैसलाबाट सफाई पाएका महरा उत्साहित भए पनि उनी अहिलेसम्म संसद गएका छैनन् । बरु उनी श्रीमतीसहित आफ्नो निर्वाचन क्षेत्रको दौडाहामा छन् ।

     

    निर्वाचन क्षेत्रका मतदातामाझ उभिएर महराले भनिरहेका छन्–काठमाडौं जिल्ला अदालतले गरेको फैसला मेरो नभएर जनताको जीत हो । महरा जिल्ला अदालतको फैसलाबाट बढी नै उत्साहित छन् भन्ने उनका पछिल्ला अभिव्यक्तिले प्रष्ट हुन्छ । तर, महराको राजनीतिक स्थान के हुने भन्नेबारे अझै अन्यौल छ ।

     

    अभियोग लागेलगत्तै राजीनामा दिन निर्देशन दिएको नेकपाले महराप्रकरणमा अहिलेसम्म मुख खोलेको छैन । त्यसैले महराको राजनीतिक स्पेसबारे अझै पनि अन्योलता नै छ ।

     

    त्यो भन्दा पनि अर्को गम्भीर मामला के छ भने महराले अझै कानुनी लडाई लड्नुपर्ने देखिएको छ । स्रोतका अनुसार काठमाडौं जिल्ला अदालतले पूर्ण सफाइ दिए पनि यो प्रकरण पुनरावेदन गर्ने तयारी गरिएको छ । स्रोतका अनुसार महराको अन्तिम फैसला अझै तयार भएको छैन ।

     

    अबको केही दिनमै अन्तिम फैसला तयार हुँदैछ । जिल्लाको अन्तिम फैसला तयारीपछि ३५ दिनभित्र सरकारवादी मुद्दा पुनरावेदन गर्ने प्रचलन छ । अभियोग लगाउने महिलाले बोली फेरेकाले यो मामला यही सुल्झने कतिपयको अनुमान छ ।

     

    तर महराले जिल्लाबारै पूर्ण सफाई पाउने सम्भावना छैन । स्रोतका अनुसार ३५ दिनपछि महरासँग जोडिएको मुद्दा उच्च अदालत पाटनमा लैजाने मनस्थितिमा सरकारी वकिल रहेका छन् । साँघु साप्ताहिक

    प्रतिकृया दिनुहोस