• फिचर

    बजेट पारित भएसँगै सरकार पुनर्गठन हुने प्रचण्डको संकेत, प्रधानमन्त्रीसँग निरन्तर छलफलमा

      ओमकार


    काठमाडौँ । पूर्वप्रधानमन्त्री तथा नेकपा अध्यक्ष पुष्पकमल दाहाल प्रचण्डले बजेट पारित भएसँगै सरकार पुनर्गठन हुनसक्ने संकेत गर्नुभएको छ ।

     

    आज पोखरामा आयोजित पत्रकार भेटघाट कार्यक्रममा बोल्दै उहाँले प्रधानमन्त्री केपी शर्मा ओलीसँग सरकारमा मन्त्रीहरु हेरफेर गर्नेबारे आफ्नो छलफल भएको बताउँदै अबको केही समयमै सरकार पुनर्गठन हुन सक्ने संकेत दिनुभएको हो ।

     

    वर्तमान सरकार जनतामा अलोकप्रिय हुँदै गएको भन्ने आरोप लागिरहेका बेला आएको प्रचण्डको सो संकेतले गहिरो अर्थ राख्छ । प्रचण्ड आफै पनि प्रधानमन्त्री ओली र केही मन्त्रीहरुको क्रियाकलाप्रति असन्तुष्ट नरहेको उहाँ निकट स्रोतले बताउने गरेका छन् ।

     

    यद्यपि उहाँले सरकारको नेतृत्व हेरफेर गर्नुपर्ने कारण नरहेको बताउँदै केही मन्त्रीहरु हेरफेर हुने संकेत गर्नुभयो । पाँच वर्षका लागि संसदबाट सरकार चुनिएको बताउँदै उहाँले सरकारको नेतृत्व परिवर्तन हुनुपर्छ भनेर कहिल्यै नभनेको दाबी गर्नुभयो । यसअघि उहाँलाई प्रधानमन्त्रीको कुर्सी तोकेको भनी आलोचना हुने गरेको छ ।

     

    ‘हिजो जे सुकै सहमति भएको भए पनि बदलिएको परिस्थितिमा सरकार पाँचै वर्ष जान सक्छ भनेको थिएँ तर मैले भन्न खोजेको कुरा बिगारेर प्रचार गरियाे,’ उहाँले भन्नुभयाे, ‘यति ठूलाे एकता प्रक्रिया र त्यसबेला गरेका प्रतिबद्धतामा दयाँबायाँ गरियाे भने त्याे राष्ट्रको लागि पनि अहितकर हुन्छ ।’

     

     

    पार्टी एकताका क्रममा सरकारको नेतृत्व पनि आलोपालो गर्ने सहमति भएको भन्दै प्रचण्डले केही समयअघि बताउनुभएको थियो ।

     

    सो सहमति भएकै हो भन्ने कुरा उहाँले पुनः दोहोर्याउनुभयो । साथै सरकार र पार्टीको नेतृत्व समेत एउटै व्यक्तिले गर्न नहुने सहमति पनि भएको खुलासा गर्दै उहाँले पार्टी एकता गरिसकेपछि सो क्रममा भएका सहमति पनि पालना हुनुपर्ने बताउनुभयो ।

     

    उहाँले एकीकृत पार्टीलाई कसरी सुदृढ ढंगले अगाडि बढाउने भन्ने बारे अहिले पनि आफू र प्रधानमन्त्री ओलीबीच छलफल भइरहेको जानकारी दिँदै ठूलो पार्टी भएकाले सतहमा देखिएका केही असन्तुष्टिहरु बाहिर आएको बताउनुभयो ।

     

    फरक प्रसंगमा उहाँल्े प्रतिबन्धित विप्लव नेतृत्वको नेकपाले राज्यसँग अटेरी गरेर अवाञ्छित गतिविधि गरिरहेको आरोप लगाउनुभयो । राजधानीमा आफ्नै मान्छे मर्नेगरी बम पड्काउने काम राम्रो थिएन भनी उहाँले विप्लव नेतृत्वका कमजोरीहरूकाे आलोचना गर्नुभयो ।

    प्रतिकृया दिनुहोस