• देश

    सात हजार डोज रेमडेसिभिर औषधी ढाकाबाट काठमाडौं आइपुग्यो,

      ओमकार टाइम्स

    काठमाडौं । कोरोनाभाइरस संक्रमितको उपचारमा प्रयोग हुने औषधी रेमडेसिभिरको सात हजार डोज औषधी आज बंगलादेशबाट काठमाडौं आइपुगेको छ ।

    औषधी व्यवस्था विभागका अनुसार आजैदेखि उक्त औषधीको वितरण सुरु गरिने भएको छ । विभागका प्रवक्ता सन्तोष केसीले थप डोज भोलि नेपाल आइपुग्ने जानकारी दिए ।

    कोभिड संक्रमित बढ्दै गएको र उक्त औषधीको माग पनि वृद्धि हुन थालेपछि नेपाल ल्याइएको विभागले जनाएको छ । दिउँसो ३ बजेदेखि औषधीको वितरण सुरु भएको समेत उनले जानकारी दिए ।

    उक्त औषधीलाई काठमाडौं र प्रदेशस्थित कोभिड अस्पतालमा पठाउने तयारी भैरहेको उनले जानकारी दिए । नेपालस्थित आधिकारिक आयातकर्ताको पहलमा औषधी ल्याइएको केसीले जानकारी दिए ।

    स्वास्थ्यमन्त्री हृदयेश त्रिपाठीले शनिबार केही दिनभित्रै कोभिडका लागि चाहिने अत्यावश्यक औषधी काठमाडौं आइपुग्ने बताएका थिए । प्रधानमन्त्री केपी शर्मा ओलीले पनि सोमबार देशवासीको नाममा सम्बोधन गर्दै चीन र रुसबाट खोप ल्याउन खरिद प्रक्रिया सुरु गरिएको बताएका थिए ।

    प्रतिकृया दिनुहोस