• खेलकुद

    एनआरटीको पहिलो जित, सातदोबाटोको पहिलो हार

      ओमकार टाइम्स

    काठमाडौं । शहीद स्मारक ‘ए’ डिभिजन लिगमा न्युरोड टिम (एनआरटी) ले सातदोबाटो युथ क्लबलाई १–० गोलको नजितामा पराजित गरेसँगै सिजनको पहिलो जित निकालेको छ ।
    त्रिपुरेश्वरस्थित दशरथ रंगाशालामा सनिबार भएको पहिलो खेलमा एनआरटीकालागि ४६औं मिनेटमा मेसुकेको क्रसमा स्टेफेन समिरले बिनङ निर्णायक गोल गरे ।
    पहिलो हाफको करिब पूरा समय रक्षापंक्तिमा व्यस्त भएको एनआरटीले दोस्रो हाफभर सातदोबाटोलाई दबाबमा राखेको थियो ।

    कप्तान मानबहादुर तामाङको क्रसमा फरवार्ड निरज चौधरीले १३ औं मिनेटमा हेडरमार्फत गरेको प्रहार एनआरटीका गोलकिपर अजित प्रजापतिले बचाएका थिए ।
    सातदोबाटोका आकाश बुढा मगरले ३५औं मिनेटमा पेनाल्टी एरिया बाहिरबाट गरेको प्रहार क्रसबार माथिबाट बाहिरिएको थियो ।

    एनआरटीका सरोज तामाङले ३९औं मिनेटमा १८ यार्ड बक्स भित्रबाट गरेको सशक्त प्रहार सातदोबाटोका डिफेन्डर पिटर सेगुनले उत्कृष्ट बचाउ गरेका थिए ।
    पहिलो हाफको इन्ज्युरी समयमा सरोज तामाङले दायाँतर्फबाट दिएको क्रसमा एनआरटीका फरवार्ड समिरको हेडर प्रहार क्रसबार नजिकबाट बाहिरिएको थियो ।
    ६०औं मिनेटमा समिरले पेनाल्टी एरिया भित्रबाट गरेको सशत्तः प्रहार सातदोबाटोका गोलकिपर अभिषेक बरालले बचाएका थिए ।
    एनआरटीका फरवार्ड दर्शन गुरुङविरुद्ध वान् भर्सेज वान्मा सातदोबाटोका गोलकिपर अभिषेकले ६५औं मिनेटमा उत्कृष्ट बचाउ गरेका थिए ।

    पहिलो चरणमा फ्रेन्डस क्लबसँग बराबरी खेलेको सातदोबाटोले दोस्रो चरणमा थ्री–स्टार क्लबलाई १–० को नतिजामा पराजित गरेको थियो । यस्तै तेस्रो चरणको खेलमा एपीएफ क्लबलाई ४–१ को नतिजामा पराजित गरेको सातदोबाटोको यो पहिलो हार हो ।
    यस्तै, पहिलो चरणमा मछिन्द्र फुटबल क्लबसँग २–१ ले पराजित भएको एनआरटीले दोस्रो चरणमा ब्रिगेड ब्वाइजसँग गोलरहित बराबरी खेलेको थियो । तेस्रो चरणमा पनि च्यासलसँग १–१ को बराबरी खेल्दै अंक बाँडेको थियो ।
    जितसँगै एनआरटी ४ खेलबाट ५ अंक जोडेर तालिकाको सातौं स्थानमा उक्लिएको छ । सातदोबाटो भने समान खेलबाट ७ अंक जोडेर तेस्रो स्थानमा छ ।

    प्रतिकृया दिनुहोस