• समाचार

    ‘मिस्टर नेपाल वर्ल्ड २०२२’ को उपाधि मोरङका नूतन श्रेष्ठले जिते

      ओमकार टाइम्स

    ‘मिस्टर नेपाल वर्ल्ड २०२२’ को उपाधि मोरङका नूतन श्रेष्ठले जितेका छन् । शनिबार अबेर साँझ आयोजित फाइनल प्रतिस्पर्धामा २६ वर्षीय श्रेष्ठले ३५ प्रतियोगीलाई पछि उपाधि जितेका हुन् । विजेता श्रेष्ठले ५ लाख नगदसहित ‘मिष्टर वर्ल्ड २०२२’ मा नेपालको प्रतिनिधित्व गर्ने अवसर समेत प्राप्त गरेका छन् ।

    श्रेष्ठलाई यस अघिल्लो ‘मिस्टर नेपाल वर्ल्ड’ विजेता डा।सन्तोष उपाध्यायले उपाधि हस्तान्तरण गरेका थिए । प्रतियोगितामा झापाका २३ वर्षीया अभिषेक चुँडाल फस्ट रनर्स अप, काठमाडौंका २९ वर्षीय एलिस गिरी सेकेन्ड रनर्स अप, कैलालीका २१ वर्षीय समिप शाही थर्ड रनर्स अप तथा मोरङका २७ वर्षीय विशाल कट्वाल फोर्थ रनर्स अप छानिए । उनीहरुले क्रमशः रु ५०, ३०, २०, १५ हजार नगद पुरस्कारका रुपमा प्राप्त गरेका थिए ।

    हायात रिजेन्सी होटलमा भव्य समारोहका बीच आयोजित प्रतियोगितामा पूर्व मिस्टर नेपालद्वय डा. आयुष्मान घिमिरे र सन्दिप पोखरेल, पूर्व मिस नेपाल ईशानी श्रेष्ठ, अभिनेत्री रिचा शर्मा, सञ्चारकर्मी एवं अभिनेता सुरजसिंह ठकुरी तथा फोटोग्राफर राजभाई सुवाल निर्णायकको रुपमा रहेका थिए । प्रतियोगितामा कुशल नहर्की पपुलर तथा एक्टिभ, डा।सुनिल खरेल पब्लिक च्वाइस, जीवन गिरी पर्सनालिटी, विकास गमाल ट्यालेन्ट, विशाल कट्वाल फोटोजेनिक, मानस घले फिजिक तथा प्रसन्न राई स्टाइल आइकन विधामा उत्कृष्ट ठहरिए ।

    ‘मिष्टर नेपाल’ पुरुष सहभागी हुने नेपालकै प्रतिष्ठित र ठूलो प्रतियोगिता हो । एक्सपोज नेपालले आयोजना गर्दै आएको यो प्रतियोगिता यस वर्षबाट नेक्स्ट मोडल्स नेपालले आयोजना गर्न सुरु गरेको हो । युवाहरुको व्यक्तित्व विकास, आत्मविश्वास अभिवृद्धि, क्षमता उजागर लगायत नेतृत्वदायी क्षमता विकास गर्ने उदेश्यले प्रतियोगिता आयोजना गरिएको नेक्स्ट मोडल्स नेपालका सिइओ रवि धमलाले बताए ।

    प्रतियोगितामा डाक्टर, इन्जिनियर, अभिनेता लगायत व्यक्तित्वको समेत सहभागिता रहेको छ । प्रतियोगिताको अन्तिम तयारी समेत पुरा भएको जानकारी नेक्स्ट मोडल्स नेपालकी कार्यकारी निर्देशक यतना पाण्डेले जानकारी दिइन् ।

    अन्तिम प्रतिस्पर्धा लागि प्रतियोगीले फिजिकल फिटनेश, मोटिभेसन सेसन, स्टेज पफमेन्स, पब्लिक स्पिकिङ, कम्युनिकेसन स्क्रिल लगायतका बिभिन्न विषयमा प्रशान्त ताम्राकार, माल्भिका सुब्बा, रोजिन शाक्य लगायतबाट प्रशिक्षण लिएका थिए । प्रतियोगिताको कोरियोग्राफर प्रशान्त ताम्राकार रहेका थिए ।

    उद्घोषण सञ्चारकर्मी एवं फेसन कोरियोग्राफर रोजिन शाक्यको सञ्चालन रहेको कार्यक्रममा प्रतियोगीले आईआईएफटीका डिजाइनरहरुले तयार पारेको डिजाइन पहिरनमा र्याम्पमा उत्रिएका थिए । एभरेष्ट ग्रुपको बिबोइङ तथा गायिका सुवानी मोक्तानको प्रस्तुतिले सांगीतिक कार्यक्रमको अर्को रौनक थियो ।

    प्रतिकृया दिनुहोस