• राजनीति

    मुख्यमन्त्री अस्वस्थ भएपछि रोकियो अध्यादेश

      ओमकार टाइम्स

    बागमती प्रदेशका मुख्यमन्त्री राजेन्द्रप्रसाद पाण्डेको स्वास्थ्यमा समस्या देखिएपछि अध्यादेश जारी गर्न बस्ने तयारी भएको मन्त्रिपरिषद् बैठक स्थगित गरिएको छ । प्रदेश सरकारले गत फागुनमा जारी ५ अध्यादेश मध्ये ४ वटा अध्यादेश फेल भएपछि पुनः अध्यादेश ल्याउने गरी तयारी भइरहेको थियो । मुख्यमन्त्री पाण्डेले उक्त तयारी अनुसार फेल भएका ४ अध्यादेशलाई मन्त्रिपरिषदबाट स्वीकृती प्रदान गर्न आइतबार बैठक आह्वान गरेका थिए ।

    आइतबार बिहान बस्ने तय भएको बैठक केही समय अघि सूचना प्रवाह गर्दै मुख्यमन्त्री पाण्डेले एक साताका लागि मन्त्रिपरिषद नबस्ने गरि स्थगन गरेका थिए । मुख्यमन्त्री पाण्डेलाई रुघा खोकी र ज्वरोको संक्रमण देखिएपछि उनलाई चिकित्सकले एक साता आराम गर्न सुझाव दिएका छन् । चिकित्सकको सुझाव अनुसार मुख्यमन्त्री पाण्डे एक साताको लागि काठमाडौंस्थित घरमा बेड रेष्टमा बसेका छन् ।

    अस्वस्थ भएपछि उनले कोभिड–१९ संक्रमणको परिक्षण समेत गराएका थिए । उनको कोभिड–१९ संक्रमण परीक्षणको पिसिआर रिपोर्ट नेगेटिभ आएको छ भने एन्टिजेन परीक्षणको रिपोर्ट भने पोजिटिभ आएको मुख्यमन्त्रीको सचिवालयले जनाएको छ ।

    अध्यादेश ल्याउनुको विकल्प छैनः मन्त्री खनाल

    बागमती प्रदेशका आन्तरिक मामिला तथा कानुन मन्त्री कृष्णप्रसाद शर्मा खनालले सरकारले पुनः अध्यादेश ल्याउने तयारी गरेको बताए ।  उनले यस अघि नै सरकार जारी गरेको अध्यादेश पूर्ण रुपमा कार्यान्वयनमा गएकाले नियमित कामकाज संचालनका लागि पनि अध्यादेश ल्याउनुको अर्को विकल्प नरहेको बताए ।

    ‘यस अध्यादेश जारी भएको अध्यादेश पूर्णरुपमा कार्यान्वयनमा गएका कारणले सरकारको कामकाज संचालनको लागि पनि पुनः अध्यादेश जारी गर्नुको विकल्प छैन ,’ उनले भने । सरकारका तर्फबाट अध्यादेशको सम्पूर्ण तयारी पूरा गरेर मन्त्रीपरिषदबाट पास गर्न मात्र बाँकी रहेको उनको भनाइ छ । सरकारले यस अघि जारी गरेर सदनबाट पास हुन नसकेका अध्यादेश पुनः ल्याउने तयारी गरेको उनले बताए ।

    उनले भने–‘हामी अध्यादेश जारी गर्ने तयारीमा छौ । हिजोको मन्त्रिपरिषदले हामीले तयार गरेको अध्यादेशलाई स्वीकृती प्रदान गर्ने थियो । मुख्यमन्त्रीको स्वास्थ्यमा समस्या भएपछि बैठक स्थगित भयो । मुख्यमन्त्रीको स्वास्थ्यमा सुधार आएपछि हामी बैठक बसेर त्यसलाई स्वीकृति दिन्छौ र अध्यादेश जारी गर्छौं ।’

    उनका अनुसार संसद चल्न सकेको खण्डमा पुनः जारी भएका अध्यादेशहरू अहिले कै सरकारले पास गर्ने र सदन चल्न नसकेको खण्डमा निर्वाचन पश्चात् आउने सरकारले गर्नेछ । बागमती प्रदेश सरकारले यस अघि जारी गरेको संघीयता कार्यान्वयनको क्रममा महत्वपूर्ण मानिएको प्रदेश निजामति सेवाको गठन, सञ्चालन र सेवाका सर्तहरू सम्बन्धमा व्यवस्था गर्न बनेको अध्यादेश, स्थानीय तहका सेवाको गठन तथा सञ्चालन सम्बन्धमा व्यवस्था गर्न बनेको अध्यादेश र प्रदेश युवा परिषद् ऐन, २०७६ लाई संशोधन गर्न बनेको अध्यादेश सदनमा पेश भए पनि पास हुन सकेको थिएन ।

    त्यस्तै अदालतमा मुद्दा विचाराधीन रहेका कारण मदन भण्डारी स्वास्थ्य विज्ञान प्रतिष्ठान ऐन, २०७६ लाई संशोधन गर्न बनेको अध्यादेशलाई प्रतिस्थापन गर्न बनेको विधेयक सदनमा पेश हुन सकेको थिएन ।

    कानुनतः अध्यादेश ६० दिनभित्रमा प्रतिस्थापन विधेयक ल्याएर पास गर्नुपर्ने हुन्छ । सरकारले जारी गरेको अध्यादेशहरूलाई प्रतिस्थापन गर्न विधेयक ल्याएपनि त्यसका थुप्रै त्रुटि र संशोधनको प्रस्ताव परेपछि ति अध्यादेश पूर्णरुपमा निष्क्रिय भएका थिए ।

    प्रतिकृया दिनुहोस