मनोरञ्जन २१ श्रावण २०८०

‘कामिनो’ मा को होला हिरोइन ?

काठमाडौंँ । दीपक वलीको निर्देशनमा बन्न लागेको फिल्म हो ‘कामिनो’ । प्रदीप खड्काको मुख्य भूमिका रहने फिल्मका लागि केही अगाडि नीति शाह र वर्षा शिवाकोटी अभिनेत्रीको रुपमा छानिएका थिए । फिल्मको काम समयमै सुरु नहुँदा नीतिकले फिल्म छाडेर सुदर्शन थापाको ‘रावायण’ जोडिएकी छन् भने वर्षाले पनि छोडेको चर्चा छ । 

यसैबीच फिल्मको अभिनेत्रीमा आना शर्मा फाइनल भएको हल्ला छ । निर्देशक दीपक ओलीले भने अभिनेत्री नीति बाहिरिएपछि अभिनेत्रीको रुपमा कोही नभित्रिएको बताए । ‘हामी फिल्मका लागि स्वस्तिमा खड्का, आना शर्मा लगायत केही अभिनेत्रीसँग कुरा गरिरहेका छौं । छिट्टै फाइनल गर्छाै । तर अहिलेसम्म कोही भित्रिएको छैन’, वलीले भने ।  

महेश दवाडीको लेखन रहेको फिल्मको छायांकन सुरुमा मेक्सिकोमा गरिने बताइएको थियो । तर त्यहाँ भिषा प्रक्रिया नमिलेपछि निर्माण पक्षले फिलिपिन्स छायांकन गर्ने बताएको छ ।  चोर बाटोबाट नेपालीहरु कसरी अमेरिका पुग्छन् भन्ने कथामा  बन्न लागेको फिल्मका सुनिल विष्ट गौली कार्यकारी निर्माता हुन् । फिल्म नेपाली, हिन्दी, अंग्रेजी र स्पेनिस भाषामा निर्माण हुने बताइएको छ ।