काठमाडौँ । फिल्म ‘रङ्गेली ग्याङस्टार’मा अभिनेत्री मिरुना मगर भित्रिएकी छन् । निर्माण युनिटले फिल्मको मुख्य भूमिकाको लागि उनलाई भित्र्याएको हो ।
आगामी भदौ २० गतेबाट छायांकनमा निस्कन लागेको फिल्मका लागि यसअघि अभिनेता अर्पण थापा छनौट भएका थिए । फिल्म अर्जुन सुवेदीको लेखन तथा निर्देशनमा तयार भएको हो ।
फिल्मका लागि बाँकी कलाकारहरु अडिसनबाट छनौट हुँदैछ । अडिसनका लागि यही साउन २१ गते पूर्वाञ्चल इन्स्चिच्युट अफ फिल्म एन्ड टेलिभिजनमा फिल्मको अडिसन राखिएको छ । ग्याङस्टर कथावस्तुमा बन्न लागेको फिल्मको छायांकन पूर्वी मोरङको रङ्गेलीमा हुनेछ । फिल्मका कार्यकारी निर्माता अनोज जंग थापा हुन् ।
अभिनेत्री मिरुना पछिल्लो समय हिट छिन् । उनी अभिनीत फिल्म ‘कबड्डी ४’ र ‘जारी’को व्यावसायिक सफलतापछि उनको फिल्ममा डिमाण्ड पनि बढेको छ । उनले केही अगाडि फिल्म ‘नाङ्गो गाउँ’को छायांकन सकाइन् भने उनी अहिले फिल्म ‘ऊनको स्विटर’ अभिनय तरखरमा छिन् ।
