दमक/ नेपाल स्टक एक्सचेन्ज (नेप्से) परिसूचक ३.४० अङ्कले बढेको छ । साताको दोस्रो दिन सोमबार उच्च कारोबार भएको बजार सो अङ्कले बढ्दा परिसूचक २६५९.२६ विन्दुमा पुगेर बन्द भएको हो ।
परिसूचकमा झिनो सुधार देखिए पनि आज कारोबार रकमले भने उत्साहजनक प्रदर्शन गरेको छ । दिनभरिमा कूल १३ अर्ब १८ करोड ६९ लाख ४५ हजार रुपैयाँ बराबरको शेयर किनबेच भएको छ । यो पछिल्लो तीन महिनायताकै उच्च कारोबार हो ।
आज कूल ३ करोड ३६ लाख ३७ हजार ९६६ कित्ता शेयरको कारोबार भयो । आज होटल समूहमा उत्साहजनक सुधार देखिएको छ । फाइनान्स र हाइड्रो समूहमा आज १ प्रतिशत बढीले घटेको छ ।
आज कारोबारमा आएका कम्पनीहरूमध्ये १२४ कम्पनीको शेयर मूल्य बढेको छ भने १२४ वटै कम्पनीको शेयर मूल्य घटेको छ । बजारमा आज पियोर इनर्जी र पिपुल्स पावरको मूल्यमा सकारात्मक सर्किट लागेको छ ।
पछिल्ला दिनमा बढ्दै गएको कारोबार रकमले बजारमा लगानीकर्ताहरूको सक्रियता हुँदै गएको देखाउँछ । तर, बढ्ने र घट्ने कम्पनीको सङ्ख्या बराबर हुनुले बजारमा लगानीकर्ताहरू अझै पनि ’पर्ख र हेर’ को अवस्थामा रहेको सङ्केत गरेको छ ।
