काठमाडौं : पूर्वराजा ज्ञानेन्द्र शाहले भारतीय गुप्तचर संस्था ‘रअ’ का प्रमुख समान्तकुमार गोयलसँग आफूले भेट नगरेको बताएका छन्। पूर्वराजा ज्ञानेन्द्रका सहयोगी डा. फणिराज पाठकले शुक्रबार विज्ञप्ति सार्वजनिक गर्दै ‘रअ’ प्रमुखसँग भेट नभएको स्पष्ट पारेका हुन्।
उनले केही अनलाइनले पूर्वराजा ज्ञानेन्द्रले मध्यरातमा ‘रअ’ प्रमुखसँग भेट गरेको भन्दै समाचार प्रकाशित गरेकोप्रति आपत्ति जनाउँदै भेट नभएको दाबी गरेका हुन्।
‘श्री ५ महाराजाधिराज ज्ञानेन्द्र वीर विक्रम शाहदेवबाट मध्यरातमा भारतीय गुप्तचर संस्था ‘रअ’का प्रमुखलाई भेटेको भन्ने केही अनलाइन पत्रिकाहरूमा छापिएका खबर पूर्णतया झूठो भएको जानकारी गराउन चाहन्छु’, पाठकले जारी गरेको विज्ञप्तिमा भनिएको छ, ‘यस्ता कपोलकल्पित, मनगढन्ते र राष्ट्रको गरिमा घटाउने समाचारले नेपाल र नेपालीको गर्व र सम्मानमा ठेस लाग्ने भएकोले यस्ता समाचार सम्प्रेषण गरेर पत्रकारिताको धर्म र समाजप्रतिको दायित्व नबिर्सन अनुरोध गर्दछु।’
