काठमाडौं । राष्ट्रियसभाको विशेष समयमा बोल्ने सांसदहरुले सीमा समस्या समाधान र कोरोना महामारी पछि आउने अवस्थाको सामना गर्न सरकार तयार हुनुपर्ने बताएका छन् । बुधबारको राष्ट्रियसभा बैठकमा बोल्दै सांसदहरुले भारतले मिचेको नेपाली भूमि फिर्ताका वार्ताको प्रकृया थाल्न सरकारलाई आग्रह गरेका छन् । सांसद रमेशजंग रायमाझीले राष्ट्रियता र लोकतन्त्र अपहरणमा परेको उल्लेख गर्दै समस्या समाधानका लागि सरकार गम्भिर नभएको बताए । रोटी र बेटी सम्बन्ध भएको बताउने छिमेकी भारतले नेपालको राष्ट्रियता अपहरण गरेको उनको भनाई छ ।
भारतसँगको सीमा समस्या समाधानका लागि सम्पूर्ण राजनीतिक दलहरुले साथ दिँदा पनि सरकारले वार्ताको पहल समेत गर्न नसकेको उनले बताए । रायमाझीले प्रधानमन्त्रीको कार्यशैलीले लोकतन्त्र अपहरणमा परेको बताए । सांसद भैरवसुन्दर श्रेष्ठले सुगौली सन्धी विपरित भारतले नेपालको सीमाना अतिक्रण गरिरहेको बताए । परराष्ट्रमन्त्री र प्रधानमन्त्रीस्तरमा समस्या समाधानका लागि वार्ता गर्न पनि उनले सरकारलाई सुझाव दिए । प्रधानमन्त्रीस्तरको वार्ताबाट पनि समस्या समाधन नभए अन्तर्राष्ट्रिय अदालत जानुपर्ने उनको भनाई छ । नेपाल भारत प्रवुद्ध समूहलेबनाएको प्रतिवेदन सदन पेश गर्न माग गर्दै उनले एक आर्थिक वर्षको बजेट सीमानामा पर्खाल लगाउनका लागि छुट्याउन पनि आग्रह गरे ।
सांसद मायाप्रसाद शर्माले कोरोना भाइरस र छिमेकी देशको भाइरसले नेपालमाथि आक्रमण गरिरहेको बताए । विश्व कोरोनासँग लडिरहेका बेला भारतले कोरोनाको रुपमा नेपालमाथि आक्रमण गरिरहेको उनले बताए । कोरोना नियन्त्रणका लागि देशभरी औषधि, दक्ष जनशक्ति लगायत अन्य स्वास्थ्य उपकरणको व्यवस्थागर्न तर्फ सरकारको ध्यानाकर्षण गराए । सांसद शेखरकुमार सिंहले नेपाल भारत सीमा समस्या वार्ताको माध्यमबाट समाधान गर्न आग्रह गरे । भारतबाट नेपाल भित्रिएका नागरिकमा कोरोना संक्रमण देखिएको उल्लेख गर्दै उनले सरकारले यसको व्यवस्थापनका लागि ध्यान दिनुपर्नेमा जोड दिए । सांसद खिमलाल भट्टराईले कोरोना संक्रमणबाट देशलाई जोगाउन भएका सरकारी प्रयासहरु सार्थक भएको उल्लेख गरे ।
विभिन्न अस्पतालमा आइसोलेसन वार्ड आइसियुको व्यवस्था हुनु, हरेक पालिकामा क्वारेन्टाइन निर्माण गरिनु, देशव्यापी लकडाउन गरी राहतको व्यवस्थापन गर्नु सरकारका सकारात्मक प्रयास भएको उनले बताए । सरकारले गरेका राम्रा कामहरुलाई पनि गरे भनेर जनतामा भ्रम छर्ने काम भएको उनले बताए । ‘राज्यका सम्बन्धित निकायहरुले छानबिन गरिरहेका वाडवडी वा स्वास्थ्य सामग्री खरिद जस्ता विषयहरु उछालेर सरकारको भ्रष्टाचार विरुद्धको संकल्प र महाअभियानमाथि भ्रम छर्ने प्रयास भएको छ’ उनले भने । भारत लगायत विभिन्न मुलुकबाट नागरिकहरु स्वदेश फर्केपछि बेरोजगारी समस्या उत्पन्न हुने उल्लेख गर्दै उनले यसको व्यवस्थापन तर्फ सरकारको ध्याना जानुपर्ने उनले बताए । खुला नाकाबाट लुकेर नेपाल प्रवेश गरिरहेको अवस्थाले भोली भयावह स्थिति आउने भन्दै सीमा क्षेत्रमा अलपत्र नागरिकरुको उचित व्यवस्थापन गर्न उनले आग्रह गरे ।
