प्रधानमन्त्रीसमेत रहेका सत्तारूढ नेपाल कम्युनिस्ट पार्टी (नेकपा)का अध्यक्ष केपी शर्मा ओलीले उपाध्यक्ष वामदेव गौतमलाई राष्ट्रियसभा सदस्य बनाउन अस्वीकार गरेका छन् ।
बुधबार बसेको सचिवालय बैठकले उपाध्यक्ष गौतमलाई राष्ट्रियसभा सदस्य बनाउने गरेको थियो । उक्त बैठकमा ओली पनि सहभागी थिए ।
बैठकपछि पार्टी प्रवक्ता नारायणकाजी श्रेष्ठले गौतमलाई राष्ट्रियसभा सदस्य बनाउने निर्णय भएको बताएका थिए ।
स्रोतका अनुसार केही बेरपछि नै प्रधानमन्त्री ओलीले सचिवालयका एक सदस्यलाई फोन गरेर वामदेवलाई राष्ट्रियसभामा लैजान नसकिने बताएका हुन् ।
‘सचिवालयले कमरेड वामदेव गौतमलाई राष्ट्रियसभामा लैजाने निर्णय गरिसकेको थियो, केही बेरपछि नै प्रधानमन्त्रीले उक्त निर्णय नमान्ने बताउनुभएकाे भन्ने कुरा आएको छ,’ सचिवालयका एक सदस्यले भने ।
तर बैठकमा सहभागी सचिवालय सदस्य झलनाथ खनालले भने भइसकेको निर्णय उल्टिन नसक्ने बताए ।
याेसँगै नेकपा नेतृत्वबीच चर्काे विवादकाे सम्भावना बढेकाे छ ।
