काठमाडौं । नेपाली कांग्रेसका नेता प्रकाशमान सिंहले अहिले मूल्य-मान्यताको राजनीति अन्त्य भएको र पावर बेस राजनीति अगाडि बढेकाले राजनीतिक दलप्रति निराशा बढेको बताएका छन् ।
२०४६ पछि आएको राजनीतिक परिवर्तनलाई संस्थागत गर्ने प्रयास सुरु हुनै लाग्दा कृष्णप्रसाद भट्टराईलाई २०४८ को चुनाव हराउनुले मुलुक गलत बाटोमा गएको उनको भनाइ थियो ।
नेपाली कांग्रेस काठमाडौं महानगरपालिका वडा नं १० ईकाई समितिले आयोजना गरेको छलफल कार्यक्रममा बोल्दै नेता सिंहले अझै पनि प्राप्त उपलब्धिमाथि चौतर्फी प्रहार भैरहेकाले मुलुकका सामु गम्भीर चुनौतीहरु देखापरेको बताएकाा हुन् ।
राजनीतिक दलहरु विधि र पद्धतिभन्दा आफ्नो स्वार्थोन्मुख भएकाले झन चुनौती थपिएको नेता सिंहले बताए । उनले राजनीतिक दलहरुका कार्यशैली सच्चिनुपर्नेसमेत बताए ।
प्राप्त उपलब्धिलाई संस्थागत गर्दै अगाडि बढ्नको विकल्प नरहेको बताउँदै उनले राजनीतिक दलहरुले जिम्मेवार बनेर आगामी चुनौतीको सामना गर्नुपर्नेमा जोड दिए ।
